काठमाडौं । प्रधानमन्त्री पुष्पकमल दाहाल प्रचण्डले गैरआवासीय नेपालीलाई नेपाली नागरिकता वितरण गरेका छन् । यस क्रममा प्रधानमन्त्रीले एनआरएनए अन्तर्राष्ट्रिय समन्वय परिषद्का अध्यक्षद्वय कुल आचार्य र बद्री केसीलाई नागरिकता प्रदान गर्दै नागरिकता वितरणको सुरुवात गरे ।

नागरिकता वितरण सुरुवात गर्न आयोजित कार्यक्रममा बोल्दै प्रधानमन्त्री दाहालले विगतमा एनआरएनएलाई एकताबद्ध गर्न, संवैधानिक र कानुनी अधिकार दिलाउन आफूले निकै ठूलो संघर्ष, मिहेनत र महत्वपूर्ण भूमिका निर्वाह गरेकै कारण नागरिकता दिन सफल भएको बताए । मंगलबार बालुवाटारमा गैरआवासीय नेपालीहरुलाई नागरिकता हस्तान्तरण गर्दै प्रचण्डले उनीहरुलाई त्यो अधिकार दिलाउन आफ्नो महत्वपूर्ण भूमिका रहेको मात्र बताएनन् उनले आफ्नै संघर्ष र पहलकै कारण नागरिकता दिलाउन सफल भएको दाबी गरे ।

एनआरएनए नेपालीको संवैधानिक अधिकारलाई कानुनी रुप दिन आफ्नो नेतृत्वमा सरकार बन्नासाथ पहल थालेको उनले बताए ।प्रधानमन्त्री दाहालले भने, ‘संविधानमा व्यवस्था भएपछि पनि कानुनी व्यवस्था गर्न हामीले फेरि अर्को संघर्ष गर्नुपर्यो । निकै ठूलो संघर्ष र मेहेनतपछि हामीले सफलता हासिल गरेका छौं । पचासौं लाख गैरआवासीय नेपालीहरूले गैरआवासीय नेपाली नागरिकता प्राप्त गर्ने प्रबन्ध गरिएको छ, यो निकै ठूलो उपलब्धि हो । मेरो नेतृत्वमा नयाँ सरकार बन्नासाथ सरकारले सम्माननीय राष्ट्रपतिज्यूलाई नागरिकता विधेयक सदर गर्न आग्रह गर्यो । राष्ट्रपतिज्यूबाट सदर भएपछि उक्त विधेयक कानुनमा परिणत भएको छ, नियमावली बनेको छ ।’

उनले एनआरएनएको १०औं महाधिवेशन समयमा सम्पन्न गर्न संघभित्रको विवाद र असहमतिहरू सुल्झाएर संघलाई एकतावद्ध बनाउन प्रधानमन्त्री हुँदा वा पार्टी अध्यक्षको हैसियतले आफूले महत्वपूर्ण भूमिका खेलेको चर्चा गरे । ‘नेपालको संविधानमा गैरआवासीय नेपालीहरूलाई आर्थिक, सामाजिक, सांस्कृतिक अधिकारसहितको गैरआवासीय नागरिकताको व्यवस्था गर्न मैले निकै ठूलो संघर्ष र पहल गरेको छु । त्यसकै बलमा तपाईहरूले संवैधानिक अधिकार प्राप्त गर्नुभएको छ,’ उनले भने । उनले एनआरएनएमा आबद्ध नेपालीसँग सम्बधित थुप्रै सवालहरूलाई आफ्नो सरकारको नीति तथा कार्यक्रम र बजेटबाट सम्बोधन गरेको भन्दै श्रमिकहरूलाई सामाजिक सुरक्षा कोषमार्फत् जोड्ने कार्य ऐतिहासिक भएको बताए ।

उनले भने, ‘वैदेशिक रोजगारीमा रहेका श्रमिकहरूलाई सामाजिक सुरक्षा कोषमार्फत् योगदानमा आधारित सामाजिक सुरक्षाको दायरामा आबद्ध गर्ने निर्णय लागू भइसकेको छ । यो एउटा ऐतिहासिक काम भएको छ जस्तो लाग्छ । अहिलेसम्म तीन लाखभन्दा बढी श्रमिक साथीहरू यो अभियानमा आबद्ध भइसक्नुभएको छ । आगामी दिनमा यो संख्या अरु बढ्ने हाम्रो विश्वास छ ।’

Submit a Comment

Your email address will not be published. Required fields are marked *

sixteen + four =